24 Вести

Прометот во индустријата зголемен за 8,8 проценти во август

Прометот во индустријата во август 2026 година бележи зголемување од 8,8 проценти во однос на август 2025 година, покажуваат податоците на Државниот завод за статистика.

Според главните индустриски групи, пораст на прометот е забележан кај интермедијарните производи, освен енергија, за 1,4 проценти, капиталните производи за 17,1 процент и нетрајните производи за широка потрошувачка за 6,9 проценти.

Кај трајните производи за широка потрошувачка, пак, е забележано намалување на прометот од 4,2 проценти.

Во однос на јули 2026 година, прометот во индустријата во август бележи пад од 16,3 проценти. Во периодот јануари – август 2026 година, во споредба со истиот период лани, прометот е зголемен за 3 проценти.

Прометот во индустријата на домашниот пазар во август 2026 година, во однос на август 2025 година, е зголемен за 4,4 проценти, додека во првите осум месеци од годинава бележи раст од 3,9 проценти.

На странските пазари, прометот во август е зголемен за 11,2 проценти на годишно ниво, додека во периодот јануари – август 2026 година растот изнесува 3,1 процент.

Најголемо влијание врз зголемувањето на вкупниот промет во индустријата во август 2026 година, во однос на август 2025 година, имаат производството на прехранбени производи со 2,7 проценти, производството на моторни возила, приколки и полуприколки со 17,4 проценти и производството на машини и уреди, неспоменати на друго место, со 17,3 проценти.

Командата за операции на Армијата ќе го одбележи Денот на единицата со воена свеченост

Припадниците на Командата за операции на Армијата ќе го одбележат Денот на единицата со воена свеченост во касарната „Боро Менков“ во Куманово.

На свеченоста, како што е најавено, ќе присуствуваат претседателката на државата и врховен командант на Вооружените сили Гордана Сиљановска-Давкова, министерот за одбрана Владо Мисајловски и началникот на Генералштабот на Армијата, генерал-мајор Сашко Лафчиски.

Деветнаесет години од загинувањето на Тоше Проески

Македонија и Балканот се сеќаваат на Тоше Проески кој на денешен ден пред деветнаесет години трагично го загуби животот во сообраќајна несреќа кај Нова Градишка, на пат кон Загреб.

Една од традициите за сеќавање на Тоше е маратонот кој маратонците од Нова Градишка го трчаат до Крушево. И оваа година 14 учесници го трчаат 19-тиот маратон во чест на Тоше. Маратонот го почнаа 13 маратонци, а уште еден ќе им се придружи во Македонија. Низ Хрватска ќе истрчаат околу 200 километри, преку Србија ќе поминат со возила, како што налагаат прописите во земјата, а од границата со Македонија до Крушево, македонските маратонци ќе истрчаат уште 220 километри.

Маратонот почна од Нова Градишка, пред неговото спомен обележје, а денеска, на годишнината од неговото загинување, маратонците треба да пристигнат во Крушево.

Крајната цел на маратонците е вечното почивалиште на Тоше Проески, споменичното обележје на Гумење во Крушево.

Интернет користат 93,7 проценти од граѓаните на Македонија, најмногу за телефонски и видео повици

Во првото тримесечје од 2026 година, 93,7 проценти од вкупното население во земјава на возраст од 15 до 74 години користеле интернет, покажуваат податоците за користењето на информациско-комуникациските технологии (ИКТ) во домаќинствата и од поединците на ДРжавниот завод за статистика.

Во истиот период, 91,2 проценти од домаќинствата имале пристап до интернет од дома.

Податоците укажуваат на широко распространета употреба на интернетот и дигиталните услуги во секојдневниот живот на населението, како и на висок степен на пристап до интернет во македонските домаќинства.

Интернет неколкупати во текот на денот користеле 81,2 проценти од населението, а исто толкав процент, нарачале или купиле стоки или услуги преку интернет во последните 12 месеци

Во косистењето на ИКТ најголемо учество од 93,5 проценти има телефонирањето преку интернет и видеоповиците (преку веб-камера и употреба на апликации како Skype, FaceTime, Messenger, WhatsApp, Viber и Snapchat).

Најголемо учество од 88.4 % има размената на пораки, главно преку Skype, Messenger, WhatsApp и Viber.

Облачно со повремен дожд, на планините слаб снег

Времето денеска ќе биде променливо облачно со повремени локални врнежи од дожд. На некои од повисоките планини врнежите ќе преминат во слаб снег. Ќе дува умерен, наместа долж Повардарието повремено засилен ветер од северен правец. Утринската температура ќе се движи од 1 до 10 степени, а дневната од 11 до 19 степени, информира Управата за хидрометеоролошки работи (УХМР).

Во Скопје времето ќе биде променливо облачно со повремен дожд. Ќе дува умерен, во делови од котлината повремено засилен ветер од северен правец. Утринската температура ќе достигне до 6 степени, а дневната до 16 степени.

Во деновите од викендот и во почетокот на новата седмица ќе преовладува сончево и стабилно време со променлива облачност во текот на денот, наведуваат од УХМР.

24 Интервал - Разговор со Иван Стоиљковиќ

Турција најавува можност за предвремени избори во 2028 година, што би му овозможило на Ердоган повторно да се кандидира

Турција веројатно ќе одржи избори порано од закажаното во мај 2028 година, потег што ќе му овозможи на претседателот Тајип Ердоган да ги заобиколи уставните ограничувања и повторно да се кандидира. Тоа го изјави неговиот советник Мехмет Учум.

„Речиси е сигурно дека изборите во 2028 година ќе се одржат во март или април“, изјави Учум за новинарите во Анкара. Иако не зборуваше директно за плановите на претседателот, неговата изјава е досега најјасна јавна поддршка од висок функционер за идејата сојузниците на Ердоган да го поместат датумот на изборите за да му обезбедат нов мандат.

Реџеп Тајип Ердоган е на власт во Турција речиси 23 години, прво како премиер, а потоа како претседател.

Референдумот од 2017 година го воведе извршниот претседателски систем, што му овозможи да биде реизбран во 2018 и 2023 година. Иако Уставот го ограничува претседателскиот мандат на два мандата, тој дозволува повторна кандидатура ако парламентот распише предвремени избори за време на вториот мандат на сегашниот претседател.

Верстапен ќе работи со нов тркачки инженер на Големата награда на САД

Возачот на Ред Бул, Макс Верстапен, ќе работи со нов тркачки инженер на претстојната трка од Формула 1 шампионатот што ќе се вози за Голема награда на САД.

Том Харт ќе ја има својата прва трка како тркачки инженер на Верстапен во Остин, заменувајќи го Џанпјеро Ламбиазе.

Ламбиазе, кој е тркачки инженер на Верстапен од неговото деби во Ф1, ќе се приклучи на Мекларен во 2028 година како директор на трката и заменик на Андреа Стела.

Се очекува Ламбиазе да остане во Ред Бул до крајот на оваа сезона, но повеќе нема да работи со четирикратниот шампион следната година, бидејќи ќе мора да земе задолжителен одмор во одреден момент, а тимот значително ќе го ограничи неговиот пристап до развој на автомобили.

Остин ќе биде првиот заеднички викенд на Верстапен и Харт - и токму Харт е тој што треба да го наследи Ламбиазе како постојан тркачки инженер на Макс од следната сезона.

Хориха од денес дел од македонската ракометна репрезентација

Македонската ракометна репрезентација доби засилување на бековската линија. Од денес Дмитро Хориха има право да игра за „црвено-жолтите“. Оваа информација ја објави Ракометната федерација на Македонија, на денешната прес-конференција на која присуствуваа претседателот на РФМ, Александар Стефанов и селекторот Кирил Лазаров.

На прес-конференцијата се говореше и за претстојните квалификации за Европското првенство 2028.

Хориха е поранешен играч на Вардар, а моментално настапува за унгарскиот клуб ПИК Сегед.

- Мислам дека добиваме еден ракометар што ќе даде тежина и голем придонес, тој е во зенитот на својата кариера и се надеваме дека со него ќе добиеме на квалитет и ќе придонесе и тој за подобри резултати во иднина, изјави Стефанов.

Селекторот Лазаров изрази задоволство од добивањето играч кој може да одговори и во одбрана и во напад.

- Се работи за играч кој има шут од надвор, кој е играч во два правци, кој има победнички карактер и во последните години покажал дека секогаш прави се за неговиот тим да победи, рече Лазаров.

Тој најави дека списокот на повикани ракометари ќе биде објавен на почетокот на следната седмица, нагласувајќи дека конкуренцијата за секое место во тимот е голема и дека репрезентацијата максимално сериозно ќе пристапи кон претстојните квалификациски натпревари.

Познати двојките за осминафиналето во фудбалскиот Куп на Македонија

Во просториите на Фудбалската федерација на Македонија денес беа извлечени двојките за осминафиналната фаза во националниот куп.

Двојки за 1/8финалето во Купот на Македонија:

Скопје – Новаци
Струга ТЛ – Беласица
Брера – Арсими
Вардар – Тиквеш
Пелистер – Силекс
Работнички – Саса
Македонија ЃП – Брегалница
Башкими – Шкендија Арачиново.

Се игра по еден натпревар (без реванш), термините се 27/28 октомври.

Рама: Владата е подготвена за дијалог со студентите, опозицијата е одговорна за насилството на улицата

Албанскиот премиер Еди Рама денеска изјави дека студентите не се одговорни за насилството во кое беше оштетена зградата на „Европскиот Колеџ“ во Тирана и ја обвини опозицијата дека стои зад ваквите дејствија, за кои рече дека имаат за цел да го нарушат имиџот на Албанија.

Во својата прва реакција на студентските протести, кои избувнаа поради барањата за подобрување на условите во образованието, Рама нагласи дека владата е подготвена за дијалог со студентите, додека сторителите на штетата ги опиша како други лица, кои ги поврза со опозицијата, објавува „Албаниан пост“.

„Ова не можат да бидат рацете на студентите. Ние сме секогаш подготвени да разговараме и да дискутираме со нив. Ова се други раце кои сакаат да ја соборат Албанија. Ова се рацете на опозицијата, која, со маски, заслепена од омраза, оган и железо, се обидува да ја врати Албанија таму каде што никогаш нема да се врати, во бездната од која сите заедно ја извлековме и од каде што се искачуваме кон историски врв, во Европската Унија“, рече Еди Рама.

Тој рече дека опозицијата е одговорна за насилството на студентските протести, со цел да го попречи патот на Албанија кон Европската Унија.

„’Европскиот Колеџ’ денеска е симбол. Ова се тешки времиња, но времиња кои ќе ги надминеме заедно, бидејќи Албанија ќе продолжи да се искачува, ќе продолжи по својот пат“, рече Рама.

Тој нагласи дека Албанија нема да дозволи да се врати во минатото и да биде попречена на патот кон европската интеграција.

„Никогаш повеќе тие раце што ја зграпчија албанската опозиција за грло и ја туркаа сè подлабоко и подлабоко, нема да можат да ја освојат Албанија“, додаде премиерот.

Рама рече дека одговорните за насилството мора да се соочат со последиците од своите постапки.

Откако учесниците на протестот во Тирана синоќа ја нападнаа полициската станица, кон која фрлаа молотови коктели, како и Министерството за правда и трговскиот центар „Топтани“, денеска избувнаа судири со учесниците на протестот во близина на Министерството за образование, каде што демонстрантите фрлаа камења, а полицијата употреби солзавец за да ја растера толпата.

Во знак на солидарност со студентите во Тирана, студентите во Скадар денес фрлаа јајца кон вратите на Ректоратот и ја бојкотираа наставата на Факултетот за странски јазици.

Протестот започна во просториите на Факултетот за странски јазици, од каде што студентите се упатија кон зградата на општина Скадар, а потоа застанаа пред зградата на Ректоратот на Универзитетот „Луиѓ Гуракуќи“.

За време на собирот пред Ректоратот, студентите го изразија своето незадоволство извикувајќи „срамота“, додека некои од нив фрлаа јајца кон вратата на зградата.

Студентите најавија дека протестите ќе продолжат.

Новиот глобален автомобилски бренд Changan официјално пристигнува во Македонија

Компанијата „Еуроимпекс“, позната како генерален застапник на седум брендови, од денес официјално станува дом на уште еден автомобилски бренд. „Еуроимпекс“ официјално го претстави брендот Changan, отворајќи ново поглавје во своето повеќедецениско искуство во автомобилската индустрија и дополнително збогатувајќи ја понудата со возила кои ги комбинираат луксузот, дизајнот, безбедноста и врвната технологија.

Маск повторно го повика Зеленски да се повлече од претседателската функција

Американскиот мултимилијардер Илон Маск повторно го повика украинскиот претседател Володимир Зеленски да се повлече од функцијата.

- Време е Зеленски да си оди, Без повлекувањето на Володимир Зеленски ќе продолжат масовните убиства, објави Маск на Икс.

Сателитска мрежа на Маск има клучна улога во руско-украинскиот конфликт, особено за комуникациите на фронтот.

Украина претходно соопшти дека е ограничена во користење на сателитските услуги на сопственикот на „СпејсИкс“ (SpaceX), што го попречило дејствувањето на беспилотните летала и воздушната одбрана на Киев.

Маск тврди дека секое забавување на мрежата се должи на американската влада, а не на неговата компанија „СпејсИкс“.

Маск посочи дека услугата „Старшилд“ (Starshield) е наменета за армијата и Украина ја користи за нејзините операции на фронтот и одбрана, додека „Старлинк“ (Starlink) е наменета за цивилни цели. И двете услуги се дел од сателитскиот систем развиен од „СпејсИкс“.

Аргумент плус - Разговор со Оливер Белопета

Најмалку тројца загинати во Украина по повеќе од 10 часа руски напади со дронови

Три лица загинаа, а шест се повредени во најновите руски напади со дронови, што траеја повеќе од 10 часа во централниот украински регион Кировоград, соопшти денеска украинската служба за цивилна заштита на „Телеграм“.

ДПА, цитирајќи ја службата за цивилна заштита, наведува дека нападнати се логистички центри, магацини и станбени згради во регионалниот центар Кропивницки. Исто така, нападната е и транспортната инфраструктура во регионот, при што избувнаа пожари.

Во соседниот Полтавски регион, со дронови се нападнати постројки за производство на гас, наведе државната енергетска компанија „Нафтогас“, од каде што соопштија дека е оштетена опрема и дека производството е привремено запрено. Нема повредени вработени.

Во текот на изминатата ноќ, руската војска употреби 580 беспилотни летала од различни типови и два проектила против цели во Украина, претходно соопштија украинските воздухопловни сили, додавајќи дека 536 од нив биле навремено пресретнати. Меѓутоа, регистрирани се удари на 31 локација, а од пад на остатоци од леталата предизвикани се штети и на 11 други локации, пренесува ДПА.

Шведскиот парламент гласаше против назначувањето на лидерката на социјалдемократите Магдалена Андерсон за премиерка

Шведскиот парламент, како што се очекуваше, денеска го отфрли обидот на лидерката на социјалдемократите, Магдалена Андерсон, да формира малцинска влада, продолжувајќи го периодот на неизвесност околу тоа кој ќе стане премиер по општите избори минатиот месец.

Четири опозициски партии од левиот центар, кои и изразија поддршка на Андерсон како премиерка, а кои на 13 септември освоија мнозинство места во шведскиот парламент- Риксдаг, не можат да се договорат кој треба да ја формира новата влада.

На изборите во септември опозициските партии освоија 176 пратенички места, наспроти 173 места за десничарскиот блок на премиерот Улф Кристерсон.

Денешното гласање е прво од четирите круга гласање, по што, доколку не се формира влада, ќе треба да се распишат нови избори.

„Уште од изборната ноќ ми беше јасно дека ќе биде потребно време и дека веројатно ќе бидат потребни неколку круга гласање за да се назначи премиер“, изјави Андерсон пред новинарите по гласањето во парламентот.

Само социјалдемократите гласаа за Андерсон, додека другите партии гласаа против.

Се очекува претседателот на парламентот да му го довери на Кристерсон од Умерената партија - втората најголема партија по социјалдемократите - следниот мандат за обид за формирање влада.

Засега нема индикации дека Кристерсон би можел да обезбеди мнозинство, па задачата за формирање влада во подоцнежна фаза повторно би можела да падне на Андерсон.

Очи в очи - 15 10 2026

Улиците во Албанија како од бојно поле – студентите бараат оставка од Владата раководена од Еди Рама

Не стивнуваат студентските протести во Албанија. Запалена е владина зграда, банки, трговски објекти. Демонстрациите што започнаа поради зголемувањето на трошоците за образование, корупцијата и можностите за работа по дипломирањето прераснаа во отворено незадоволство на студентите од работата на Владата и сѐ погласни барања за оставка на премиерот Еди Рама. Полицијата мораше да употреби водени топови и солзавец за да ги растера демонстрантите кои претходно предизвикаа пожар во зградата на Министерството за образование, запалија филијала на „Рајфајзен банка“, а со молотови коктели беше нападната и полициска станица. За студентите, ниту актуелната влада ниту опозицијата не се прифатлива опција да ја предводат државата.

Изјава – жител на Албанија: „Овие протести се за сите жители на Албанија. Сакаме подобри услови за студирање, да нема корупција. Луѓето се многу гневни на системот. Сѐ мора да се смени во државата.“

Изјава – жител на Албанија: „Тука сме да протестираме против најкорумпираната влада. Тие го злоупотребуваат сѐ она што нашата држава може да го понуди.“

Еди Рама, пак, не помислува на оставка. Во првата реакција на студентските протести, Рама порача дека Владата е подготвена за дијалог, а одговорноста за настанатата штета ја префрли на опозицијата. Според Рама, нивната цел е да го нарушат меѓународниот имиџ на Албанија.

Еди Рама, премиер на Албанија: „Ова не можат да бидат рацете на студентите. Ние сме секогаш подготвени да разговараме и да дискутираме со нив. Ова се други раце кои сакаат да ја соборат Албанија. Ова се рацете на опозицијата, која, со маски, заслепена од омраза, оган и железо, се обидува да ја врати Албанија таму каде што никогаш нема да се врати, во бездната од која сите заедно ја извлековме и од каде што се искачуваме кон историски врв, во Европската Унија.“

Ова се најнасилните протести досега против Еди Рама, кој во мај минатата година го освои четвртиот мандат на функцијата. Сепак, како што тврдат албанските медиуми, Рама сега е соочен со растечко незадоволство и перцепција за корупција кај водечките функционери. Немирите избувнаа откако летово имаше серија мирни протести против Рама, поттикнати од предложениот проект за развој на луксузно одморалиште долж јужниот брег на Албанија, финансиран од Џаред Кушнер, зет на американскиот претседател Доналд Трамп.

Ден на слепите лица: Македонија уште многу треба да работи за задоволување на нивните потреби!

Унапредување на патната инфраструктура, тактилни патеки, безбедни премини и пристапно опкружување, не само во центрите на градовите, туку и во населбите, враќање на повластениот превоз, разграничување на личната асистенција и унапредување на додатокот за попреченост ова се само дел од барањата на слепите ица кои директно беа адресирани во Законодавниот дом прет претставници на законодавната и извршаната власт. Побараа, Фондот за здравствено осигурување да обезбеди поедноставен и помалку оптоварувачки пристап до белиот стап и другите помагала, како и враќање на правото на придружник при болничко лекување и рехабилитација. Посочија дека дигиталната пристапност мора да стане правило, а не исклучок. Клучно е според, слепите лица ратификација на Маракешкиот договор.

пратеникот и претседавач на Интерпартиската парламентарна група (ИППГ) за правата на лицата со попреченост, Никола Мицевски, нагласи дека пристапноста до јавните простори, тротоарите, институциите и информациите не е дополнителна поволност или луксуз, туку основен предуслов за остварување на човековите права и обезбедување еднакви можности.

Слепите лица денеска во Собранието потенцираа дека денеска на одбележувањето на Денот на белиот стап парадоксално е тоа што самиот бел стап не е достапен за слепите лица.

Повеќе сали за помалку чекање: Финишира реконструкцијата на болницата „Св. Еразмо“ во Охрид

Новото крило на Специјалната болница за ортопедија и трауматологија „Св. Еразмо“ во Охрид, чија изградба практично беше замрзната од 2017 година, сега влегува во нова фаза со ветување дека работите ќе завршат до крајот на годината.Според надлежните, затворена е финансиската конструкција тешка над два милиона евра – средства обезбедени од Фондот за здравство, сопствениот буџет на установата и донации, а избран е и нов добавувач.Амбициите на хартија се големи,болницата треба да скокне од сегашните нецели две, на вкупно четири современи операциони сали.Тоа значително ќе ги олесни и подобри условите за пациентите но и лекарите.

Но, она што останува отворено прашање во јавноста и стручните кругови е дали објектот ќе биде следен и од соодветен број медицински персонал. Најголем недостиг се чувствува кај медицинските сестри и инструментарките, особено со зголемениот обем на работа за време на туристичката сезона и зголемениот број интервенции и сообраќајни незгоди.Проблемот се продлабочува со заминувањето на искусниот кадар во пензија, иако раководството од установата и Министерството за здравство најавуваат долгорочни решенија и заменување на кадарот.

Специјализираната болница „Св. Еразмо“ со децении освен пациенти од Охрид и Струга – за специфични ортопедски, трауматолошки и неврохируршки зафати опфаќа и пациенти од сите градови во државава, но и од соседните држави како Албанија. Годишно низ амбулантите и операционите сали поминуваат десетици илјади пациенти, што го прави ова проширување клучно прашање за целокупниот здравствен систем.

Граѓаните нарачуваат на интернет, а на врата нарачката ја плаќаат во кеш

Од чекање до одење е насловот на девета годишна регионална конференција за Е- трговија. Звучни имиња од големи коорпоеации како Мајкрософт, Гугл, Линктин, Амазон, Тесла, Виза, ќе бидат говорници, а освен од топ глобални компании на конференцијата свои говори ќе имаат и домашни експерти од областа на електронското плаќање. Претседателката на Асоцијацијата за е – трговија Нина Ангеловска Станков вели дека оваа година акцентот ќе биде ставен на примената на вештачката интелигенција во трговијата на интернет.

Нина Ангеловска Станков: „Предизвикот е како да се оптимизираат компаниите и за вештачката интелигенција да ги одбира нив, се поставува веќе едно интересно порашање, дали вештачката интелигенција ќе може да биде лојална на брендовите на купувачот. Но, намерата на човекот останува, мора ние како луѓе да ја имаме интенцијата да ги имаме парите, зошто на крајот на денот ие ја вршиме трансакцијата и плаќаме, а вештачката интелигенција треба да не насочи и помогне во нашиот избор.“

Податоците од Асоцијацијата за Е- трговија велат дека 30 проценти од граѓаните кои користат интернет во земјава имаат основни или повисоки дигитални вештини, а речиси 85 отсто од населението има сметка во финансиска институција или во компанија која нуди мобилни финансиски услуги. Сепак, добар дел од граѓаните и натаму на прво место им е физичкото пазарување, а преку он лајн вршат плаќање на сметки или прават некоја ситна набавка.

Податоците на Народната банка велат дека во првиот квартал од годинава се направени он лајн трансакции во вредност од 265 милиони евра, што претставува раст од речиси 20 проценти на годишно ниво. Кон македонските е- продавници прометот изнесувал нешто над 150 милиони евра а останатите 100тина милиони се реализирани кон странски интернет продавници.

И покарј тоа што расте бројот на граѓани кои што пазарат на интернет најголемиот дел од нив се уште го променуваат традиционалниот начин на плаќање. Дури 68 проценти од граѓаните кога ќе нарачаат производ преку интернет не го плаќаат веднаш со својата картичка, туку чекаат да им стигне на врата за да го платат во кеш.

Нова инвестиција на компанијата „Кромберг и Шуберт“ – потпишан договор во Владата

Нова инвестиција на германската компанија „Кромберг и Шуберт“, нови 2.000 работни места и производство на делови за германскиот автомобилски гигант „Ауди“ – во Владата денеска беше потпишан договор со германската компанија.

Во фабриката во индустриската зона Жабени ќе се произведуваат системи за нов модел на „Ауди“, со планиран обем од над 3.000 снопови дневно. Инаку, проектот предвидува и воведување современи технологии и дигитализација на производството, вели Ѓорѓи Тренковски, комерцијален директор на „Кромберг и Шуберт“.

Од март 2027 Флајдубаи ќе воспостави директна линија Дубаи – Скопје со три лета неделно

Во рамки на работната посета на Обединетите Арапски Емирати, министерот за надворешни работи и надворешна трговија Тимчо Муцунски остварил средба и со главниот комерцијален директор на Флајдубаи, Хамад Обаидала.

На средбата официјално било потврдено дека од март наредната година, Флајдубаи ќе воспостави директен лет Дубаи – Скопје три пати неделно.

Разговарано било и за можностите што ќе ги донесе ваквата директна линија во делот на унапредувањето на економските и трговските врски, привлекувањето странски инвестиции, како и продлабочувањето на туристичката и културната соработка меѓу двете земји.

Две институции – два различни податока за странските инвестиции во земјава?!

Македонија има повеќе странски инвестиции од лани, но поголемата сума не значи дека сите пари се вложени во нови фабрики и вработувања. Ова го покажуваат податоците на Народната банка, кои ги објавува и Државниот завод за статистика. Во првите шест месеци од годинава, Народната банка бележи нето-прилив од 279 милиони евра. Во истиот период лани 183 милиони, а разликата е околу 96 милиони евра. Сепак, инвестициите не биле рамномерно распоредени. Од јануари до март се регистрирани 223 милиони евра. Во следните три месеци околу 56 милиони. Тоа е многу помалку од почетокот на годинава, иако е повеќе од истиот период лани.

Странски инвестиции носат и компаниите што веќе работат во земјава, кога вложуваат во проширување на производството. Таков проект денеска најави германската „Кромберг и Шуберт“. Во фабриката во Жабени кај Битола ќе се произведуваат автомобилски компоненти за нов модел на „Ауди“, а во следните четири години се предвидени две илјади нови работни места. Од компанијата најавуваат дека со проектот ќе се прошири и работата на домашните инженери.

Во вкупната сума на странските инвестиции влегуваат и заработката што компаниите ја задржуваат во земјава и заемите меѓу поврзани фирми. Затоа, растот на хартија треба да се следи и преку конкретните резултати. За проектот во Битола, тие ќе се мерат во следните години со оствареното производство, со бројот на нововработени и со платите што ќе ги добиваат.

Опозициските партии се изјаснија по предлогот на Мицкоски за вклучување во дијалогот со Бугарија

Повикот на премиерот Мицкоски опозициските партии да се вклучат во дијалогот , за евро - интеграциите различно го протолкуваа политичките опоненти .Од Бихаќка денска категорични дека нема да бидат дел од таквите преговори и дека ова е како што велат во реакцијата само циркус за јавноста . Додаваат и дека токму Мицкоски е тој што треба да каже на каде ја води државата .

СДСМ: Ние не учествуваме во циркузот Медрано, тоа го прават сателитите на Мицкоски . Мицкоски работи на изолација а не на интеграција . Реформите не се спроведуваат , европскиот пат е запрен заради Мицкоски и неговиот страв од сочување со одговорноста . Додека за другите земји има патокази , за извесно членство во ЕУ Македонија ја нема никаде . Не е прашањето што ќе направи опозицијата туку што ќе направи Мицкоски . Целата одговорност е кај Христијан Мицкоски .

Од ДУИ пак велат секогаш се за евроинтегративните процеси но треба предлогот внимателно да се продискутира и разгледа . Во реакцијата за ТВ 24 велат

ДУИ: Секогаш сме подготвени да дадеме било каков придонес на патот кон евроинтеграциите - било да е од позиција на власти или опозиција . Сепак треба да се види какви се намерите на овој отворен повик и што сите заедно можеме да направиме .

Од Левица пак велат дека допрва ќе го разгледаат предлогот на партиско ниво па потоа ќе изграделе став

ЛЕВИЦА: Се уште немаме изградено став. Денес ќе го разгледаме предлогот на состанокот на партиските тела .

Предлогот опозицијата да се вклучи во преговорите за евроинтегративните процеси вчера го изнесе премиерот Мицкоски на собраниската говорница како одговор на пратеничко прашање кое го поставија од Европскиот фронт а во тој контекст Мицкоски додаде дека добро би било опозициските партии да се вклучат и во акцискиот план за малцинствата .

ЕК за ТВ 24: Европската комисија не интервенира во билатерални случаи – конзуларната помош првенствено спаѓа на националните органи

Европската Комисија со порака за случајот „Ива Михаилова“ - Брисел не интервенира во билатерални случаи.

Во одговор до ТВ 24, од Комисијата велат дека конзуларната помош првенствено е во надлежност на националните органи. До Брисел беа испратени прашања: дали македонското МНР ја информираше Комисијата за случајот, дали реакциите на бугарските власти се во согласност со обврските на Бугарија како членка на ЕУ и дали Брисел ќе побара дополнителни одговори за случајот со Михаилова.

Портпарол на Европска Комисија : Комисијата не интервенира во билатерални случаи, а конзуларната помош првенствено спаѓа во надлежност на националните органи.

И додека Скопје ја бара со меѓународна потерница, Софија ја одбива екстрадицијата, повикувајќи се на Европската конвенција и отсуството на ратификуван договор. Михаилова ја напушти Македонија само неколку дена по тет-а-тет средбата меѓу Муцунски и Чамова.

Во меѓувреме, од Берлин, шефицата на бугарската дипломатија Петрова-Чамова испрати порака за европските вредности. На средбата со германскиот колега Вадефул, таа порача дека почитувањето на основните права и недискриминацијата се клучни вредности на ЕУ.

МНР Република Бугарија : Министерката Петрова нагласи дека проширувањето мора да остане процес заснован на индивидуални заслуги, суштински реформи, исполнети критериуми и почитувани преземени обврски. Таа истакна дека почитувањето на основните права и недискриминацијата се клучни европски вредности, додека говорот на омраза и манифестациите на антиевропска реторика се неприфатливи.

Според експертите, случајот Ива Михаилова е шлаканица за македонската дипломатија.

Иво Рангеловиќ експерт : Ова е шлаканица за македонската дипломатија, дали е поредно или непосредно крива. Нашата дипломатија оди во официјална Софија и тие им велат наши доктори ќе дојдат да ја видат Ива Михаилова, само по себе ми ја потценуваат интелигенцијата. Нашите доктори не чинат? Дали јас ако не дај боже убијам човек во Бугарија во сообраќајна несреќа, ќе ми дозволат со македонски пасош – македонски лекар да ме лечи? Министерот за здравство денска вели – нема никаков здравствен случај. Па кажете му го тоа на шефот на дипломатијата да не разговара за бугарски доктори да доаѓаат во Македонија.

Дипломатскиот притисок од Скопје, пак, продолжува. МНР пред два дена го повика бугарскиот амбасадор Желјазко Радуков за да изрази незадоволство од приемот на Михаилова во Бугарија. За ТВ 24 од министерството порачаа и дека Муцунски веќе испратил реакција до Европската Унија и земјите-членки, а во наредниот период ќе бидат информирани и сите релевантни европски институции и меѓународни организации.

Мицкоски: Со Михаилова, Бугарија покажува мускули – таткото и ќерката Михаилови кога-тогаш ќе одговараат!

Демонстрирање политичка моќ и нарушување на меѓусоседските односи. Премиерот Христијан Мицкоски со критика до официјална Софија за случајот со Ива Михаилова. Според првиот човек на Македонската Влада бугарските политичари правеле естрадна ѕвезда од осомничено лице кое на нелегален начин ја поминало македонската граница. Мицкоски е дециден дека и Михаилова и нејзиниот татко ќе одговараат пред македонските власти.

Оставка од министерот за внатрешни работи Панче Тошковски и целосно расчистување на случајот побара опозициската СДСМ. Од партијата обвинија дека Михаилова слободно ја преминала границата во договор меѓу, како што тврдат, македонските и бугарските власти.

Од ВМРО-ДПМНЕ, пак, го оспорија конзилијарното мислење на неврологот Иван Барбов. Од владејачката партија тврдат дека медицинската состојба на Михаилова наложувала неврохируршки третман.

Бугарските власти засега немаат соопштено дека презеле конкретни активности за утврдување на локацијата на Михаилова. Бугарското Министерство за внатрешни работи информираше дека таа има двојно државјанство, посочувајќи дека меѓународните и домашните правни прописи предвидуваат можност за одбивање екстрадиција на сопствени државјани. Бугарското МВР се повикува и на член 6, став 1, точка „а“ од Европската конвенција за екстрадиција, според кој секоја договорна страна има право да одбие екстрадиција на свои државјани.

Националната федерација на фармери го одбележа Меѓународниот ден на руралните жени

Националната федерација на фармери денеска во Струмица го одбележа 15 октомври – Меѓународниот ден на руралните жени под мотото „Жените земјоделки-лидери на одржливото земјоделство и руралниот развој“.

На собирот во Струмица присуствуваа земјоделки од целата држава, а настанот го поздрави министерот за земјоделство, шумарство и водостопанство, Борче Серафимовски.

Осврнувајќи се на податоците од Единствениот регистар на земјоделски стопанства на Министерството за земјоделство, шумарство и водостопанство, во кој се евидентирани 129.226 земјоделски стопанства и 29.971 жена, од кои 3.918 се помлади од 40 години, министерот Серафимовски ја нагласи заложбата за поголемо учество на жените во управувањето со стопанствата и развојот на сопствени дејности, како и за надминување на стереотипот за земјоделството како „машка професија“.

-Сакам да информирам дека во пресрет на овој ден, на 13 октомври е објавен повик за мерката 115, поддршка за активен женски член во земјоделското семејство, односно домаќинство од Програмата за финансиска поддршка на руралниот развој за 2026 година. Предвидени се од 360 илјади денари по корисник за опрема за преработка и доработка на примарни земјоделски производи за услуги за спроведување на деловниот план. Според условите на повикот може да аплицираат регистрирани стопанства, чиј носител или член е жена. Рокот за аплизирање е до 13 ноември, истакна министерот Серафимовски.

Додаде дека покрај можностите за инвестиции со тоа се зајакнува и социјалната сигурност на жените земјоделки, а со ребалансот на буџетот се зголемени средствата за социјална сигурност на жените кои вршат земјоделска дејност од еден милион на 2,5 милиони денари.

-Програмата предвидува вкупно 100 илјади денари по корисничка за деветмесечен надомест за мајчинство за жените во статус на осигуреник индивидуален земјоделец кој ги исполнува условите. Барањата се поднесуваат до Агенцијата за финансиска поддршка најдоцна до 10 декември, подвлече Серафимовски.

Според претседателот на Националната федерација на фармери (НФФ), Стеванче Јорданоски, на овој ден се истакнува важноста на трудот и посветноста на руралната жена.

-Како НФФ забележуваме дека жената земјоделка се уште не е доволно препознанена и нејзиниот труд се уште не е доволно платен. Мерката 115, која тука ја спомна министерот, ја поздравуваме, бидејќи е битна за развојот на нашите земјоделки, за земјоделските стопанства и секако за развој на руралните средини. Покрај овие финансиски поддршки од државата, битно е да имаме и други практични обуки за жените земјоделки, нови знаења и пристап до пазари со цел да зајакнат економски и да го развијат својот бизнис, рече Јорданоски.

За жените земјоделки најголем проблем е сигурниот пласман на производството.

-Со упорност и макотрпна работа се живее од земјоделство, но и жените да бидат упорни да можат да ги користат фондовите. Јас прозведувам бостан, домати, модар патлиџан, тутун, тикви, ореви. Годината на почетокот беше тешка, посебно во поглед на пласманот, но сега е добро, рече Трајанка Златковиќ од село Пепелиште, неготинско.

На настанот се обратија Рита Колумбина, постојана координаторка на Обедините нации во нашата држава, Лоло Дарин, раководител за развојна соработка на Амбасадата на Шведска, Кристина Митиќ Арсова, национален координатор на програма и проект менаџер на ФАО и Сашо Ангеловски, национален менаџер на We Effect за Европа.

Во продолжение на настанот се одржи панел-дискусија на тема „Од ресурси до резултати: Како да обезбедиме еднаков пристап до знаења и иновации на жените земјоделки“.

Беа доделени признанија на четири успешни жени земјоделки и на една локална граѓанска организација за нејзиниот значаен придонес кон зајакнувањето на руралните жени и жените земјоделки.

Андоновски: До 31 декември е рокот за усогласување на веб-страниците и апликациите со стандардите за пристапност

Постојните веб-страници и мобилни апликации на институциите од јавниот сектор треба да се усогласат со стандардите за дигитална пристапност до 31 декември годинава во согласност со Законот за пристапност на веб-страниците и мобилните апликации - истакна денеска министерот за дигитална трансформација, Стефан Андоновски.

Обраќајќи се на настанот по повод Меѓународниот ден на белиот стап во Собранието, Андоновски нагласи дека пристапната средина не се однесува само на физичкиот простор, туку и на дигиталните услуги преку кои граѓаните добиваат информации, поднесуваат барања и пристапуваат до услугите на институциите.

- За слепите и за лицата со оштетен вид, пристапната електронска услуга може да значи самостојно читање информации, пополнување образец или добивање документ. Тоа значи заштедено време, помала потреба од туѓа помош и поголема приватност при користењето на личните податоци - рече Андоновски.

Тој потсети дека Законот за пристапност на веб-страниците и мобилните апликации на институциите од јавниот сектор беше донесен во Собранието минатата година, со примена од 1 јули 2026 година, со што домашната регулатива првпат се усогласува со Европската директива 2016/2102.

Законот предвидува веб-страниците и мобилните апликации да овозможуваат користење со тастатура, гласовна контрола и асистивни уреди, а нивните функции да бидат јасни и предвидливи и содржините соодветно обработливи од асистивните технологии. Предвидени се и пристапни алтернативи, меѓу кои текстуални описи на слики, аудиоописи, наслови, транскрипти и алтернативни формати. Граѓаните имаат право да побараат пристапна алтернатива, а институцијата е должна да одговори во рок од 15 работни дена, со обезбедување алтернатива или соодветно образложение.

- Институциите имаат обврска да објавуваат изјава за пристапност и да овозможуваат пријавување проблеми. Ова е значаен чекор, а неговата вредност треба да се чувствува при секое користење на јавните услуги. Затоа нашата работа продолжува преку следење на примената, поддршка на институциите и соработка со корисниците - нагласи министерот.

Андоновски истакна дека во подготовката на законското решение учествувале здруженија на лицата со попреченост, претставници на институциите и академската заедница преку работни состаноци, јавни дебати, консултации и јавна расправа во Собранието.

Тој оцени дека соработката со организациите на лицата со попреченост треба да продолжи и при развојот и тестирањето на дигиталните услуги бидејќи нивното искуство е неопходно за да се утврди дали одредено решение навистина функционира и каде се потребни подобрувања.

- Како министер за дигитална трансформација сметам дека успехот на дигитализацијата треба да го мериме преку можноста секој граѓанин самостојно да ја заврши својата обврска. Нашата цел е технологијата да отвора повеќе можности за образование, работа и учество во општеството, а не да затвора врати - рече Андоновски.

Тој порача дека дигиталните услуги треба да овозможуваат поголема самостојност и да ја направат комуникацијата со институциите полесна и попристапна за сите граѓани.

Слепите лица бараат законско признавање на факсимилот, подобрување на пристапноста на превозот и дигитална еднаквост како услови за независно живеење

Воведување на факсимилот како правно признаен начин на потпишување за слепите лица, подобрување на пристапноста во јавниот простор и превозот, унапредување на личната асистенција и додатокот за попреченост, поголема дигитална пристапност и ратификација на Марокешкиот договор се меѓу клучните барања што денеска ги упати Кети Петреска, претставничка на Националниот сојуз на слепите лица во Македонија, на одбележувањето на Меѓународниот ден на белиот стап во Собранието.

Обраќајќи се пред членовите на интерпартиската парламентарна група за правата на лицата со попреченост, пратениците и претставниците на извршната власт во Собранието на одбележување на Меѓународниот ден на белиот стап на тема: „Правото на независно живеење, од бел стап до пристапна средина“, Петреска рече дека и покрај повеќедецениското постоење на Сојузот, состојбата на слепите лица во државата сè уште е далеку од стандардите предвидени со Конвенцијата за правата на лицата со попреченост.

Како прво барање таа го посочи воведувањето на факсимилот како законски признат начин на потпишување за слепите лица и лицата со попреченост оценувајќи дека недостигот од такво решение ја ограничува нивната самостојност и претставува форма на дискриминација.

Петреска побара и подобрување на пристапноста на јавниот простор преку поставување тактилни патеки, обезбедување безбедни премини и достапен јавен превоз.

- Белиот стап е симбол на достоинството и средство за движење, но доколку нема соодветни услови во средината, неговата функција е ограничена - истакна таа.

Во своето обраќање Петреска се осврна и на потребата од унапредување на услугите за поддршка нагласувајќи дека личната асистенција треба да биде јасно разграничена од негата и да се темели на принципите на Конвенцијата за правата на лицата со попреченост.

Таа побара и зголемување на додатокот за попреченост и посочи дека пристапот до белиот стап и другите помагала преку Фондот за здравствено осигурување треба да биде поедноставен и помалку административно оптоварувачки за корисниците.

Петреска оцени дека дигиталната пристапност мора да стане правило, а не исклучок, укажувајќи дека голем дел од јавните дигитални платформи и услуги сè уште не ги исполнуваат стандардите за пристапност.

- Бараме доследна примена на стандардите за дигитална пристапност и воспоставување фонд за асистивна технологија и дигитална опрема - порача претставничката на Републичкиот сојуз.

Во делот на образованието, Петреска посочи на недостигот од пристапни материјали, Брајово писмо и соодветна поддршка во образовниот процес нагласувајќи ја потребата од дополнителни рехабилитациски услуги и поддршка за слепо-глувите лица.

Таа побара и ратификација на Марокешкиот договор, како и модернизација на библиотеката за слепи лица во современа пристапна библиотека според европските стандарди.

Министерот за социјална политика, демографија и млади Ѓоко Велковски во своето обраќање порача дека реформата во системот на процена на попреченоста треба да овозможи процената да не се заснова исклучиво на медицинска дијагноза, туку да ги земе предвид и функционирањето на лицето, влијанието на средината и потребната поддршка.

Велковски посочи дека Министерството континуирано работи на унапредување на системот на социјална заштита, подобрување на пристапот до правата и развој на социјални услуги, што одговараат на потребите на граѓаните, со цел да се обезбедат поголема самостојност, социјална вклученост и достоинствен живот за лицата со попреченост.

- Нашиот пристап се темели на принципите дека поддршката треба да биде достапна, навремена и соодветна на индивидуалните потреби. Правата утврдени со законската рамка треба да се преточат во конкретни можности за поголема самостојност, социјална вклученост и достоинствен живот на лицата со попреченост - рече Велковски.

Тој нагласи дека во реформскиот процес се вклучени и претставници на Националниот сојуз на слепите, чие искуство и знаење придонесуваат за подобро препознавање на специфичните предизвици со кои се соочуваат слепите и слабовидните лица.

Министерот посочи дека паралелно со реформата, Министерството работи и на унапредување на социјалните услуги, со определба тие да одговараат на реалните потреби на корисниците и да придонесуваат за нивно поголемо вклучување во заедницата.

Тој најави дека Министерството ќе продолжи со институционалната поддршка на Националниот сојуз на слепите и на другите организации на лицата со попреченост, истовремено охрабрувајќи ги да ги зајакнуваат своите капацитети и да ги користат можностите што ги нуди законската рамка за развој и обезбедување социјални услуги.

Портпаролката на Владата, Марија Митева, со порака дека искуствата и предлозите на лицата со попреченост мора да бидат дел од креирањето на политиките.

Митева нагласи дека институциите имаат одговорност да создаваат услови за поголема самостојност на лицата со попреченост, особено на слепите и слабовидните лица, а резултатите може да се постигнат преку заедничка соработка со нивните организации и експертската јавност.

Потпишан Меморандум за соработка меѓу Фондацијата „Скопје ЕПК 2028“ и Францускиот институт

Фондацијата „Скопје – Европска престолнина на културата 2028“ и Францускиот институт во Скопје потпишаа Меморандум за соработка под покровителство на Град Скопје, со цел развој на заеднички културни проекти, размена на уметници и експерти и унапредување на културните и креативните индустрии.

Меморандумот го потпишаа денеска градоначалникот на Град Скопје, Орце Ѓорѓиевски, амбасадорот на Франција во земјава, Кристоф Ле Риголер, директорот на Францускиот институт во Скопје, Грегоар Жислер, и директорот на Фондацијата „Скопје ЕПК 2028“, Марјан Цветковски.

Ѓорѓиевски истакна дека партнерството ќе овозможи поврзување на македонските уметници со европската културна сцена и создавање нови културни содржини за граѓаните.

- Со ова партнерство отвораме врати за заеднички уметнички продукции, размена на уметници и експерти и развој на културните и креативните индустрии. Создаваме простор нашите творци да се поврзат со европската културна сцена, а скопјани да добијат нови, квалитетни и достапни културни содржини - наведе Ѓорѓиевски.

Посебен акцент, како што посочи градоначалникот, ќе биде ставен на соработката со францускиот град Бурж, со кој Скопје во 2028 година ќе ја споделува титулата Европска престолнина на културата, како и на можноста за организирање „Француска сезона во Скопје 2028“.

- Посебно ќе се посветиме на соработката со Бурж, со кој во 2028 година ја споделуваме титулата европска престолнина на културата, како и на можноста за реализација на „Француска сезона во Скопје 2028“ - истакна Ѓорѓиевски.

Целта е, додаде, партнерството да придонесе за трајни културни врски меѓу двата града, нивните уметници и култури, и по завршувањето на 2028 година.

- За мене, успехот на Скопје 2028 ќе се мери и со можностите што ќе ги создадеме за младите, со поддршката за нашите уметници и со културата што ќе стигне до секој граѓанин. Сакам оваа титула да остави трајна вредност во животот на нашиот град - порача Ѓорѓиевски.

Упати благодарност до францускиот амбасадор, Францускиот институт и партнерите за поддршката, оценувајќи дека соработката е дел од подготовките на Скопје за европската културна престолнина во 2028 година.

Целосно се обновува главната водоводна мрежа во Кадино

Градоначалникот на општина Илинден, Александар Георгиевски изврши увид во градежните активности за санација на главната водоводна мрежа во должина од околу 650 метри во н.м Кадино, соопшти Општината.

Во рамки на проектот, се вели во соопштението, старите, дотраени и оштетени водоводни цевки се заменуваат со нови полиетиленски цевки Ф280, со што значително ќе се подобри функционалноста и сигурноста на водоводниот систем.

Градоначалникот Георгиевски истакнал дека со реализацијата на овој проект ќе се овозможи континуирано и стабилно водоснабдување, намалување на загубите на вода и одржување стабилен притисок во водоводната мрежа.

Тој нагласил дека во претходниот период се санирани 1.400 метри од главната водоводна мрежа во Кадино, а со тековната санација на дополнителни 650 метри, целосно ќе биде обновена главната водоводна мрежа во ова населено место.

-Со завршувањето на градежните активности ќе се реши долгогодишниот проблем со дотраената водоводна инфраструктура и честите дефекти, со што ќе се обезбеди посигурно, поквалитетно и стабилно водоснабдување за жителите на Кадино - се наведува во соопштението.

Емилија Алексовска и Џоко Диков - кандидати за член на Судскиот совет

Комисија за прашања на изборите и именувањата со седум гласови „за“ и ниту еден против и воздржан на денешната седница ги утврди предлог кандидатите - Емилија Алексовска, адвокат од Куманово и Џоко Диков, адвокат од Струмица за член на Судскиот совет.

Согласно Законот за судски совет, како што појасни претседателот на Комисијата Ѓорѓија Сајкоски, во рок од три дена од спроведување на интервјуто, Комисијата за селекција утврдува ранг-листа на кандидати со образложение за секој кандидат поединечно. Листата ја доставува до Комисијата за прашања на избори и именувањата на Собранието на Република Македонија, во рок од два дена ја објавува ранг-листата со поединечно бодување на секој кандидат и му предлага на Собранието двојно повеќе кандидати од бројот на членови на советот што треба да бидат избрани, водејќи се од редоследот на ранг-листата под услов да има доволен број пријавени кандидати. Комисијата за селекција до Комисијата за прашања на избори и именувања достави записник од спроведено интервју со кандидати по огласот за избор на член на Судскиот совет на Република Македонија.

На предлог на претседателот на Комисијата, членовите едногласно ја донесоа предлог одлуката за именување на Филип Саревски за член на Управниот одбор на Агенцијата за цивилно воздухопловство.

Саревски, како што појасни Сајкоски, е дипломиран авиоинженер и магистер по воздухопловна техника и технологија и работи во Агенцијата за цивилно воздухопловство.

- Филип Саревски е раководител на Одделение за пловидбеност, национален САФА координатор, инспектор за пловидбеност и техничко одржување, магистер авиоинженер и техника и технологија, дипломиран авиоинженер по воздухопловна технологија и технологија авионика, средно образование има математички науки. Работи во Агенцијата за цивилно воздухопловство и како истакнат член и човек кој што е одвнатре го предлагам да биде член на Комисијата за член на Управниот одбор на Агенцијата за цивилно воздухопловство, истакна Сајкоски.

Тој доаѓа на местото на Весна Павлов, чиј мандат истекува на 18 ноември оваа година.

На денешната седница на предлог на претседателот Сајкоски, беше утврдена и предлогот одлуката за именување на Марко Димитриоски за член на Републичкиот совет за безбедност на сообраќајот на патиштата.

Марко Димитријевски, како што образложи Сајкоски, е дипломиран машински инженер и доктор по машински инженеринг. Завршил Машински факултет на Универзитетот „Кирил и Методиј“ во Скопје, а докторирал на Машинскиот факултет, Институт за индустриско инжинерство - Скопје.

Студио 10 - Разговор со Насер Џемаили и Милена Величковиќ

Студио 10 - Разговор со Јанко Бачев

Мицкоски за бегството на Михаилова: Кога тогаш ќе одговара

Демонстрирање политичка моќ и нарушување на меѓусоседските односи. Премиерот Христијан Мицкоски со критика до официјална Софија за случајот со Ива Михаилова.

Според првиот човек на Македонската Влада бугарските политичари правеле естрадна ѕвезда од осомничено лице кое на нелегален начин ја поминало македонската граница. Мицкоски е дециден дека и Михаилова и нејзиниот татко ќе одговараат пред македонските власти.

Новиот глобален автомобилски бренд Changan официјално пристигнува во Македонија

Компанијата Еуроимпекс, позната како генерален застапник на 7 брендови, од денес официјално станува дом на уште еден автомобилски бренд.„ЕУРОИМПЕКС“ официјално го претстави брендот Сhangan, отворајќи ново поглавје во своето повеќедецениско искуство во автомобилската индустрија и дополнително збогатувајќи ја понудата со возила кои ги комбинираат луксузот, дизајнот, безбедноста и врвната технологија.

Со ова клиентите во Македонија ќе добијат поголем избор, а во рамките на компанијата „Еуроимпекс“, ќе имаат на располагање сеопфатна понуда на едно место.

Еврото падна на најниско ниво во последните 16 месеци

Еврото падна на најниско ниво во последните 16 месеци во однос на американскиот долар, откако новите податоци за инфлацијата во САД ги поттикнаа инвеститорите да вложуваат повеќе во американската валута. Според податоците од девизниот пазар Форекс, еврото во 14:30 часот се тргуваше за 1,11251 долари, објави „Трединг економикс“. Годишната инфлација во САД во септември достигна 3,7 проценти, над очекувањата на пазарот. Ова ги зголеми прогнозите дека Федералните резерви би можеле да ги задржат каматните стапки на сегашното ниво или дополнително да ги зголемат.

Бугарија не ја бара Ива Михаилова и нема да ја екстрадира во Македонија

„Државјанин на Република Бугарија не може да биде екстрадиран на друга држава или на меѓународен суд за целите на кривично гонење, освен ако тоа не е предвидено со меѓународен договор што е ратификуван, прогласен и стапен во сила за Република Бугарија“ – соопшти денеска бугарското Мининистерство за внатрешни работи во врска со случајот со Ива Михајлова, по која македонското МВР распиша меѓународна потерница, откако викендов таа избега во Бугарија, а во судот во Кочани ѝ се суди за сообраќајна несреќа со смртни последици.

– На 13 октомври во 19:38 часот, Дирекцијата за меѓународна оперативна соработка (DIOC) прими известување од Интерпол Скопје со барање за распишување меѓународна потерница за апсење и екстрадиција на Ива Михајлова – државјанка и на Бугарија и на Република Северна Македонија. Во известувањето беше наведено дека против Михајлова се води постапка за сообраќаен прекршок (дело казниво според член 300 од Кривичниот законик на Република Северна Македонија) и дека Судот во Кочани издал налог за нејзино апсење на истиот датум – 13 октомври 2026 година. До овој момент, за Михајлова не е издадена „Црвена потерница“ (Red Notice). Бугарските власти не презеле никакви дејствија за лоцирање на лицето на бугарска територија. Потсетуваме дека, согласно член 25, став 4 од Уставот на Република Бугарија: „Државјанин на Република Бугарија не може да биде екстрадиран на друга држава или на меѓународен суд за целите на кривично гонење, освен ако тоа не е предвидено со меѓународен договор што е ратификуван, прогласен и стапен во сила за Република Бугарија.“ Член 6, став 1а од Европската конвенција за екстрадиција предвидува: „Секоја договорна страна има право да ја одбие екстрадицијата на своите државјани.“ – се наведува во соопштението од бугарското МВР.

Македонските власти реагираа за бегството на Михајлова и за начинот на кој е пречекана во Софија, оценувајќи го како провокација која ги подрива напорите за градење доверба и развој на добрососедските односи, како и мешање во правниот систем на државата.

Фактор здравје - Хроничната болка во зглобовите

Гостин: м-р Македонка Силјаноска - дипл. физиотерапевт и сертифициран лимфотерапевт

Хоџа: Министерството за животна средина не е надлежно за отпадот во Куманово

Во врска со градот Куманово таму има постапка за избор на компанија која ќе реализира изградба на регионален центар за собирање на отпад во Свети Николе. Овој регионален центар се финансира од ЕУ и преку ИПА фондовите и Министерството не е директно инволвирано, изјави вчера на седницата за опозициски прашања министерот за животна Мухамет Хоџа одговарајќи на прашање на пратеникот Оливер Спасовски од СДСМ во врска со проблемот со депонијата Краста во Куманово и одложувањето отпад.

„Последните информации што ги имаме се дека постапките се уште продолжуваат и оти чекаме наскоро финална одлука за која ние како Министерство се надеваме дека ќе биде позитивна, односно дека ќе се направи избор на компанија и операторот наскоро да почне со изградба на регионален центар за собирање на отпад што ќе биде во Свети Николе“, изјави Хоџа.

Во согласност со нашите закони транспортот, собирањето и одложувањето на отпадот во нашата земја се во директна надлежност на локалната самоуправа.

Делови од општините Центар и Карпош денеска без вода

Од ЈКП Водовод и канализација известуваат дека денеска без водоснабдување ќе бидат:

· Поради поврзување од стара на нова водоводна мрежа од ф-400мм на Ф200мм на улица Мирослав Крлежа бб, прекинато водоснабдување ќе имаат дел од корисниците од Мирослав Крлежа потегод од Булевар Партизански Одреди до улица Орце Николов, општина Центар. Водоснабдувањето ќе биде прекинато од 08:30 часот до завршување.

· Поради уличен дефект од ф 100мм на улица Прашка бр.50 со прекинато водоснабдување ќе бидат улица Прашка, Дамска дел од Букурешка, Гимназија и ОУ.Нова, општина Карпош. Водоснабдувањето ќе биде прекинато од 09:00 часот.

Без струја денеска делови од општините Кисела Вода и Ѓорче Петров

Од ЕВН Македонија АД известуваат дека денеска без електрична енергија ќе останат:

· Поради активности во електродистрибутивната мрежа без напојување ќе биди улицата Партизански Пат 2 од 09.00-13.00 часот, општина Кисела Вода;

· Поради активности во електродистрибутивната мрежа без напојување ќе биди улицата 2 во село Орман од 09.00-15.30 часот, општина Ѓорче Петров.

Студентските протести во Тирана ескалираа во судири со полицијата

Насилството за време на протестите во Тирана се прошири и врз образовни институции и приватни бизниси во комплексот на Пирамидата, еден од најпрепознатливите објекти во албанската престолнина. Демонстранти кршеа стакла, оштетуваа деловни простории и предизвикуваа пожари, а меѓу нападнатите објекти е и „Cube“, каде што се наоѓа претставништвото на College of Europe.

Според албанските медиуми „Panorama“, „Pamfleti“ и „Shqiptarja.com“, група демонстранти по судирите со полицијата пред седиштето на Владата се упатила кон Пирамидата, на булеварот „Dëshmorët e Kombit“. Таму биле искршени стаклата на повеќе деловни објекти, оштетени влезови, а во дел од просториите биле предизвикани пожари.

Меѓу нападнатите објекти е и „Cube“, во кој се наоѓа претставништвото на College of Europe во близина на Пирамидата. Според информации на Рацин.мк, демонстрантите најпрво ги искршиле стаклата на објектот, а потоа фрлиле запаливи предмети во внатрешноста, предизвикувајќи пожар. Засега нема официјална проценка на материјалната штета.

Вечерва почнува Скопскиот џез-фестивал

Со настапот на словенечкиот перкусионист и композитор Златко Каучич вечерва, 15 октомври, во 20 часот започнува 45. Скопски џез-фестивал. До 18 октомври, во Националната опера и балет ќе се одржат 11 концерти со музичари од 13 земји, распоредени во четири фестивалски вечери. Осум концерти се на главната сцена, а три полноќни настапи за првпат ќе се одржат на малата сцена во истиот објект.

Четврток, 15 октомври: Каучич, октетот на Скорупа и полноќ со Мира и Дрејк

Фестивалот вечерва во 20 часот го отвора Златко Каучич со составот Комбо БЦ и проектот „Храброста на храбрите“. Словенечкиот перкусионист, тапанар и композитор настапува со поранешни студенти и гости од Италија.

Во 22 часот следува Леонхард Скорупа, тенор-саксофонист, кларинетист и композитор, со меѓународниот состав Њу Квиспел Октет. За отворањето на фестивалот тој подготви ново музичко дело, а основниот квинтет го прошири со тројца македонски музичари: Божидар Пеиќ на виолончело, Бојан Талевски на виола и Ѓорѓи Петрушевски на обоа.

Полноќната програма, на малата сцена во Националната опера и балет, ја носи дуото Пасквале Мира и Хамид Дрејк. Италијанскиот вибрафонист и американскиот перкусионист и вокалист ќе настапат во првиот од трите полноќни концерти на фестивалот.

Петок, 16 октомври: Норвешка и Исланд преку проектот „Пункт“

Втората вечер е поврзана со „Пункт“, меѓународниот музички проект од норвешкиот град Кристијансанд, познат по спојувањето на импровизацијата, електрониката и музичките ремикси во живо.

Во 20 часот настапуваат норвешките музичари Ејвинд Орсет, на гитара и електроника, и Јан Банг, кој работи со семплирање во живо. Во 22 часот следува исландското дуо Скули Сверисон и Олоф Арналдс. Сверисон е композитор и бас-гитарист, а Арналдс композиторка и мултиинструменталистка.

На полноќ, Ерик Оноре и Јан Банг, основоположници на „Пункт“, ќе изведат ремикс во живо на малата сцена во Операта.

Сабота, 17 октомври: Андреа Мирческа, Ндудузо Махатини и полноќен дуо-настап

Саботната програма започнува во 20 часот со квинтетот на македонската вокалистка Андреа Мирческа и нејзиниот проект „Успаванка за лунатици“. Мирческа е добитничка на наградата за најдобар џез-музичар на Скопскиот џез-фестивал во 2019 година.

Во 22 часот настапува јужноафриканскиот пијанист и композитор Ндудузо Махатини, кој снима за престижната џез-издавачка куќа „Блу ноут“. Неговата музика ги поврзува џезот, духовноста и музичките традиции на Јужна Африка.

Третиот полноќен концерт го носат британскиот пијанист, композитор и органист Александер Хокинс и шведската вокалистка Софија Јернберг, родена во Етиопија. Нивниот заеднички проект „Мушо“ ја заокружува саботната програма на малата сцена.

Недела, 18 октомври: „Сао Паоло андерграунд“ и затворање со Венсан Пејрани

Последната фестивалска вечер започнува во 20 часот со бразилско-американското трио „Сао Паоло андерграунд“, кое ги истражува можностите на електроакустичната музика, спонтаното компонирање и звучното експериментирање.

Фестивалот ќе го затвори францускиот хармоникаш Венсан Пејрани со квинтетот „Ливинг Бинг“. Составот ги поврзува џезот, рокот, современата композиција и различните музички традиции, создавајќи простор за колективна импровизација и истражување на звукот.

Во недела нема полноќен концерт.

Бугарија не ја бара Ива Михајлова и нема да ја екстрадира во Македонија

„Државјанин на Република Бугарија не може да биде екстрадиран на друга држава или на меѓународен суд за целите на кривично гонење, освен ако тоа не е предвидено со меѓународен договор што е ратификуван, прогласен и стапен во сила за Република Бугарија“ - соопшти денеска бугарското Мининистерство за внатрешни работи во врска со случајот со Ива Михајлова, по која македонското МВР распиша меѓународна потерница, откако викендов таа избега во Бугарија, а во судот во Кочани ѝ се суди за сообраќајна несреќа со смртни последици.

- На 13 октомври во 19:38 часот, Дирекцијата за меѓународна оперативна соработка (DIOC) прими известување од Интерпол Скопје со барање за распишување меѓународна потерница за апсење и екстрадиција на Ива Михајлова – државјанка и на Бугарија и на Република Северна Македонија. Во известувањето беше наведено дека против Михајлова се води постапка за сообраќаен прекршок (дело казниво според член 300 од Кривичниот законик на Република Северна Македонија) и дека Судот во Кочани издал налог за нејзино апсење на истиот датум – 13 октомври 2026 година. До овој момент, за Михајлова не е издадена „Црвена потерница“ (Red Notice). Бугарските власти не презеле никакви дејствија за лоцирање на лицето на бугарска територија. Потсетуваме дека, согласно член 25, став 4 од Уставот на Република Бугарија: „Државјанин на Република Бугарија не може да биде екстрадиран на друга држава или на меѓународен суд за целите на кривично гонење, освен ако тоа не е предвидено со меѓународен договор што е ратификуван, прогласен и стапен во сила за Република Бугарија.“ Член 6, став 1а од Европската конвенција за екстрадиција предвидува: „Секоја договорна страна има право да ја одбие екстрадицијата на своите државјани.“ - се наведува во соопштението од бугарското МВР.

Македонските власти реагираа за бегството на Михајлова и за начинот на кој е пречекана во Софија, оценувајќи дека тоа претставува провокација која ги подрива напорите за градење доверба и развој на добрососедските односи, како и мешање во правниот систем на државата.

Министерот за внатрешни работи Панче Тошковски и вицепремиерот Александар Николоски вчера изјавија дека очекуваат Бугарија како земја членка на НАТО и на Европската Унија, да постапи по издадената меѓународната потерница, да ја уапси Михајлова и да ја врати во Макеоднија.

Ива Михајлова, која има и бугарско државјанство, во Македонија е обвинета во судска постапка за сообраќајна несреќа со смртни последици. По нејзиното бегство од земјава, по неа е распишана централна и меѓународна потерница, а кочанскиот суд и одреди мерка притвор во траење од 30 дена. За неа беа изречени мерки на претпазливост а и беа одземени патните документи.

Македонското МВР претходно соопшти дека таа нелегално излегла од Македонија и нелегално влегла во Бугарија.

- Преку заедничкиот контакт-центар со Република Бугарија извршени се проверки и од страна на бугарската гранична полиција, од каде што е добиена информација дека за наведеното лице нема евидентиран легален влез на територијата на Република Бугарија - соопшти МВР.

Бугарските медиуми објавија дека Михаилова се наоѓа во Софија, иако претходно ѝ биле одземени двата пасоша – македонскиот и бугарскиот, како дел од превентивните мерки со кои требало да се спречи нејзино заминување од државата.

24 Анализа - Случајот Ива Михаилова, уште еден од низата пребегнувања од правдата преку граница

Пет македонски борци ќе настапат на „ФНЦ 34“ во Скопје

Петмина борачи од Македонија ќе бидат дел од првиот настан на најголемата ММА организација во Европа, „FNC 34 Fight Nation Championship “ што ќе се одржи во СЦ „Т Арена/Борис Трајковски“, Скопје на 24 октомври.

Македонската ММА Федерација ќе ја претставуваат: Даниела Алексовска, Марко Трајановски, Тоше Цветков, Ален Амедовски и Дино Старчевиќ.

Ќе има 11 борби, главната е за титулата во која ќе се соочат

- По повик од многубројни фанови од Македонија, ФНЦ доаѓа по првпат во Скопје. Многу веројатно не сме последен пат овде. Доаѓаме со сериозни борби, ние сме во подем, растеме секој ден. Гледачите ќе можат 4-5 часа да уживаат во спектакуларни борби, изјави на денешнатДражен Форгач, основач и претседател на „ФНЦ“.

Поддршка на настанот дава и Министерството за спорт.

- Министерството за спорт секогаш ќе дава поддршка на вакви проекти кои го промовираат спортот и Македонија. Очекувам интересни борби и полна сала, истакна министерот Ристовски.

Даниела Алексовска, прогласена за Млада спортистка на Македонија за 2025 година, во кафезот влегува како носителка на бронзен медал од Светското ММА првенство во Тбилиси 2025 и полуфиналистка од Светското првенство во Ташкент 2024. Со шест од девет победи освоени со субмисија, Алексовска е еден од најперспективните женски борци во регионот. Нејзин противник ќе биде Мина Хаѕопулу од Грција.

- Очекувам интересна борба. Голема чест ми е што ќе насташувам пред македонска публика и се надевам на победа, рече Алексовска.

Марко Трајановски е првиот Македонец кој освоил злато на Европско ММА првенство — историски успех постигнат во Белград во февруари 2025 година, со победи над претставници на Романија, Бугарија, Украина и Италија во финалето. Титулата ја освои на само 16 години. Против него ќе стои Лука Лаиновиќ од Црна Гора.

- Му порачувам на мојот противник добро да се подготви. Мислам дека тој нема што да бара во оваа борба. Тој на моите прашања нема одговор, јас на неговите има, порача самоуверено Трајановски.

Во главната борба на вечерта, Лом-Али Ескиев ја брани титулата во лесна категорија против Марко Бојковиќ.

Марковиќ го објави списокот за ЕХФ неделата

Селекторот на македонската женска ракометна репрезентација, Игор Марковиќ, денес го објави списокот на ракометарки повикани за претстојната ЕХФ недела.

На списокот на Марковиќ се наоѓаат следниве ракометарки:

Андреа Илиќ
Драгана Петковска
Јована Мицевска
Емилијана Ризовска
Леона Миленкоска
Сара Ристовска
Марија Гугуњанова
Ивана Џатевска
Ивана Гакидова
Катерина Дамјаноска
Јована Кипријановска
Ива Младеновска
Бојана Коцева
Теодора Дукоска
Ивана Арсениевска
Михаела Кралева
Таида Беровиќ
Сара Стефановска
Андреа Седлоска
Сара Бооеска
Александра Коловска.

Собирот на македонската репрезентација е закажан за 19 октомври во Скопје.

За избраничките на Марковиќ ова ќе бидат последните подготовки пред настапот на Европското првенство кое ќе се одржи во декември.

Во Кочани започна обука на 23 фудбалски тренери преку програмата „Фудбал за животни вештини“

На Градскиот стадион „Никола Мантов“ во Кочани денеска беше означен почетокот на меѓународната програма KNVB Worldcoaches, „Фудбал за животни вештини“ што ја реализира Кралската холандска фудбалска федерација, со поддршка од UEFA, во партнерство со организацијата „ТАКТ“.

Во присуство на холандската амбасадорка Узлем Џанел и градоначалникот на Општина Кочани Владко Грозданов, официјално започна обуката на 23 фудбалски тренери од источниот регион, кои ќе се стекнат со меѓународни лиценци.

– Вашиот град помина низ многу тежок период, и колку и да сакаме, за жал, не можеме да го смениме тоа што се случи во март, минатата година. Она што сепак можеме да го направиме е заедно да работиме кон подобра иднина за сите, особено за младите луѓе во овој регион. Фудбалот е многу повеќе од игра, креира чувство на припадност, ги сплотува луѓето и им дава можност на младите да се развиваат и надвор од теренот. Вие, учесниците во оваа програма, сте многу повеќе од обични тренери – вие сте оние што можат да креираат безбедна околина која ќе ги поттикне младите да станат најдобрата верзија од самите себе. Фудбалот е одличен начин да се спојат луѓето и да бидат заедно, за да работат за подобро општество – истакна амбасадорката Џанел.

Заблагодарувајќи се за обуката којашто носи долгорочна вредност за локалниот спорт, градоначалникот Грозданов рече:

– Оваа програма е значајна придобивка за нас и за нашите тренери. Имаме многу солидни тренери што со ваша поддршка ќе се стекнат со лиценци од меѓународен карактер од Фудбалската федерација на Холандија. Како Општина ги прифаќаме сите овие позитивни примери и се надеваме на уште попродуктивна и попродлабочена соработка, рече тој.

Магдалена Спасовска од партнерската организација „ТАКТ“ соопшти дека од дваесет и тројцата тренери што учествуваат на обуката, десетина се жени.